Мемлекет басшысы Digital Bridge кешенінде әмірлік Presight компаниясының президентімен кездесті
Ағымдағы жылдың 12 қазанында Астанада Digital Bridge 2023 форумы аясында. Мемлекет басшысы мен әмірлік Presight компаниясының президенті Томас Прамотедхэм арасында екіжақты кездесу өтті, оған Қордың басқарма төрағасы қатысты. Келіссөздер нәтижесінде «Самұрық-Қазына» АҚ мен Presight арасында инвестициялық негізгі шарттар туралы келісімге қол қойылды. Бұл келісімнің негізгі мақсаты – «Самұрық-Қазына» АҚ еншілес ұйымдарының өндірістік процестерін цифрландыру жобаларын жүзеге асыру үшін Қазақстанда бірлескен кәсіпорын құру.
«Қор елдің стратегиялық активтерін басқарушы ретінде цифрландыруды өзінің басым бағыттарының бірі деп санайды. Presight-пен бірлесіп, елдеріміз арасындағы серіктестікті нығайтуға және бірыңғай цифрлық қоғамдастық құруға үлес қосамыз деп сенемін», – деді Нұрлан Жақыпов. Presight AI – G42 тобына кіретін жасанды интеллект негізіндегі үлкен деректерді талдау саласындағы жетекші компания. G42 Group – жасанды интеллект пен бұлтты есептеулерге маманданған әлемдік көшбасшы. Presight AI нарықтық капитализациясы шамамен 5 миллиард долларды құрайды. Компания БАӘ мен Парсы шығанағы елдерін қоса алғанда, 14 елде табысты жобаларды жүзеге асырды.
«Самұрық-Қазына» АҚ тобында цифрландыруды енгізу бизнес-процестерді оңтайландыруға, өндіріс шығындарын азайтуға, компаниялардың тиімділігін арттыруға мүмкіндік береді. Бұл бастама экономиканың негізгі салаларындағы экономикалық өсімге ықпал етіп қана қоймай, жергілікті кадрлардың құзыреттілігін арттыруға ықпал етеді.
Дереккөз: «Самұрық-Қазына» АҚ баспасөз орталығы